រមណីយដ្ឋានកាំពី

ក្រចេះ៖ រម្មណីដ្ឋានកាំពី ដែលជាតំបន់ទេសចរណ៍ធម្មជាតិ ស្ថិតនៅខេត្តក្រចេះ បានទាក់ទាញភ្ញៀវទេសចរជាតិ-អន្តរជាតិច្រើនជាងគេ ក្នុងចំនោមរម្មណីដ្ឋានទាំង១៧កន្លែង មិនថាថ្ងៃបុណ្យ រឺថ្ងៃឈប់សម្រាកក៏នៅតែមានភ្ញៀវទៅកម្សាន្តជាប់ជាប្រចាំផងដែរ។

លោក រុណ ភារ៉ា ប្រធានមន្ទីរទេសចរណ៍ខេត្តក្រចេះ បានឲ្យដឹងថា នៅក្នុងខេត្តក្រចេះ មានរម្មណីដ្ឋានទាំងអស់ ចំនួន១៧កន្លែង ក្នុងនោះរម្មណីដ្ឋានធម្មជាតិមានចំនួន៩កន្លែង រម្មណីដ្ឋានវប្បធម៌ប្រវត្តិសាស្រ្តមាន៦កន្លែង និងរម្មណីដ្ឋានកែច្នៃមាន១កន្លែង។ លោកបន្តថា រម្មណីដ្ឋានដែលបានទាក់ទាញភ្ញៀវទេសចរជាតិ និងអន្តរជាតិ ច្រើនជាងគេ មិនថាថ្ងៃបុណ្យ រឺថ្ងៃឈប់សម្រាកនោះទេ ក៏មានភ្ញៀវទៅកម្សាន្តជាប់ជាប្រចាំមាន២កន្លែង គឺរម្មណីដ្ឋានអន្លង់ផ្សោត និង រម្មណីដ្ឋានកាំពី ដែលជាតំបន់ទេសចរណ៍ធម្មជាតិផងដែរ។

លោកបានបន្តថា ចំពោះសេវាកម្មនៅក្នុងខេត្តក្រចេះ ជាពិសេសអាជីវករលក់ដូរនៅររម្មណីដ្ឋានកាំពី អាជីវករភាគច្រើនមានការយល់ដឹងជាងមុខ ដោយសារតែខាងមន្ទីរនៅតែបន្តឲ្យមន្រ្តីជំនាញ ចុះទៅផ្សព្វផ្សាយ អំពីវិស័យទេសចរណ៍ និងពង្រឹងការអប់រំ លើផ្នែកសេវាកម្មចំណីអាហារ និងអនាម័យ កំណត់តម្លៃឲ្យបានសមរម្យជូនភ្ញៀវទេសចរ សហការជាមួយ និងកម្លាំងអាជ្ញាធរ ដើម្បីជួយសម្រួលដល់ភ្ញៀវដែលបានមកកម្សាន្តក្នុងរម្មណីដ្ឋានផងដែរ ។

លោកបន្តថា ដើម្បីជួយបង្កើនជីវភាពរបស់ប្រជាពលរដ្ឋ ក្នុងវិស័យទេសចរណ៍ ខាងមន្ទីរ បានអនុញ្ញាតក្នុងមួយគ្រួសារទទួលបានតូបលើទឹចំនួនមួយ សម្រាប់លក់ម្ហូបអាហារ ជូនភ្ញៀវនៅក្នុងរម្មណីដ្ឋានកាំពី។

ទេសចរជាតិ-អន្តរជាតិ ជាច្រើននាក់ បានសម្រុកធ្វើដំណើរទៅលេងកម្សាន្តតាមតំបន់រមណីយដ្ឋាន នានា ក្នុងប្រទេសកម្ពុជា ក្នុងឱកាសនៃពិធីបុណ្យប្រពៃណីជាតិចិន ។

រមណីយដ្ឋានទឹកជួរកាំពី ក្នុងខេត្តក្រចេះ នៅតែជាទីកម្សាន្តមួយដ៏ទាក់ទាញភ្ញៀវទេសចរជាតិ-អន្តរជាតិ ក្នុងចំណោមតំបន់ទេសចរណ៍ ធម្មជាតិ ជាច្រើនទៀត ក្នុងព្រះរាជាណាចក្រកម្ពុជា ជាពិសេសក្នុងឱកាសនៃពិធីបុណ្យផ្សេង ដូចជា ពិធីបុណ្យចូលឆ្នាំប្រពៃណីខ្មែរ បុណ្យភ្ជុំបិណ្ឌ និង បុណ្យចូលឆ្នាំចិន ជាដើម។