រមណីដ្ធានស្ងប់ស្ងាត់ ស្អាតត្រជាក់ លាក់ខ្លួនពួនអាត្មានៅខេត្តកំពត ក្បែរសមុទ្រយើងសោះ

ភ្នំកូនសត្វ : ស្ថិតនៅក្បែរអតីតតំបន់សមរភូមិក្តៅភ្នំវល្លិ៍ បច្ចុប្បន្នក្លាយជារមណីយដ្ឋានសម្រាកលំហែរកាយដ៏ប្រណិតបែបជនបទ ជាពិសេសមានអាងហែលទឹកបន្តុបលើកំពូលភ្នំដ៏ថ្លាដូចកញ្ចក់ !រមណីយដ្ឋាននៅលើភ្នំកូនសត្វ គឺជារមណីយដ្ឋានសម្រាប់ភ្ញៀវទេសចរប្រាថ្នាភាពស្ងប់ស្ងាត់ ដែលមានទីតាំងនៅក្នុងឃុំកូនសត្វ ស្រុកទឹកឈូ ខេត្ដកំពត ចម្ងាយ៥ គីឡូម៉ែត្រពីទំនប់ប្រឡាក់ក្រឡា។ នៅទីនោះមានទេសភាពស្ងប់ស្ងាត់បែបជនបទ និងមានអាងហែលទឹកលើកំពូលភ្នំពណ៌ខៀវស្រងាត់អាចគយគន់ឆ្លុះជួរភ្នំកូនសត្វខាងឆ្វេងនិងស្ដាំ ព្រមទាំងជួរភ្នំវល្លិដ៏អន្លាយសន្លឹម។

សូមជម្រាបជូនថា នៅពាក់កណ្តាលទសវត្សរ៍ឆ្នាំ១៩៩០ តំបន់ភ្នំវល្លិ៍ ជាទីតាំងយុទ្ធសាស្រ្តយោធាដ៏រឹងមាំរបស់ក្រុមខ្មែរក្រហមក្នុងចំណោមទីតាំងកាន់កាប់ដទៃទៀតនៅភាគនិរតីប្រទេសកម្ពុជា ដែលស្ថិតនៅក្នុងចន្លោះភូមិសាស្រ្តរវាង ខេត្តកែប និងខេត្តកំពត ជាពិសេសភ្នំវល្លិ៍ ជាមូលដ្ឋានប្រយុទ្ធដ៏រឹងមួយរបស់ខ្មែរក្រហម ដែលមានភូមិសាស្រ្តស្ថិតនៅជិតបំផុតនឹងព្រំដែននៃប្រទេសវៀតណាម។